Cheeky Quotes

Rabu, 05 Desember 2012

Pasan Mandeh


     Katiko barado di rantau urang atau katiko badan jauah dari urang gaek, kadang-kadang takana juo pasan mandeh nan nyo sampaikan wakatu ka pai marantau.
     Baa pulo mandeh indak ka bapasan mancaliak anak bujangnyo ka pai ka tanah urang nan jauah. Tapi baa kabaa rantau ko harus dihadang juo bak kecek urang, lauik sati rantau batuah. Itu nan ka dicubo; baa bana tuah rantau tu.
                Salain tu urang-urang saisuak pun bakato:
                Karatau madang di ulu
                Babuah babungo balun
                Marantau bujang dahulu
                Dikampuang baguno balun
               
     Elok-elok dirantau urang. Kok dapek jan sampai babuek salah. Iduik di rantau,  apolai di tampek nan rami kito harus banyak-banyak  ingek. Di nan rami nyao dak barago saikua ayam do. Baitu kato mandeh. Sasuai juo jo kecek urang dulu
                Elok-elok manyubarang
                Jan sampai titian patah
                Elok-elok di rantau urang
                Jan samapi babuek salah

    Tapi kok dicaliak-caliak memang urang minang ko jarang tadanga babuek buruak di rantau. Urang awak ko murah sangaik manyasuaian diri jo lingkungan nan ado. Baa dek mode tu? Karano di dalam jiwanyo alah tatanam dima bumi di pijak disitu langik dijunjuang. Urang banyak nan sanang ka urang minang karano saulah. Indak macam-macam. Makonyo induak-induak banyak nan nio urang minang jadi minatunyo.
      Salero jan ditahan. Iko nan taruih dipasanan mandeh. Jan pernah manahan salero. Jikok taragak nio mambali bali se lah. Baitu kecek urang gaek. Karano pitih guno e memang untuak di balanjoan. Salain tu pitih dapek dicari. Tapi soal ka makan jan cameh lai. Urang awak ado se dima-dima nan mambukak rumah makan Padang. Jikok taragak makan randang, gulai kapalo lauak, nasi kapau, katupek gulai cubadak, dll dak paralu paniang-paniang do sabauk urang awak ado manjua tu sadonyo dan rasonyo pun samo jo nan di kampuang nyo.
    Jikok balanjo jan berbahasa indonesia raya pulo, tapi bahaso awak se pakai. Baa pulo mode tu. Namonyo awak dirantau tu harus bisa bahaso daerah situ atau paliang indak bahaso Indonesia. Tapi pado kenyataannyo banyak urang nan manggaleh tu urang awak juo. Jadi kalau dak mangaratinyo diajak bahaso minang barati ndak urang awak tu do. Kalau urang awak nan manggaleh harago bisa kurang saketek, dek awak samo awak juo.
   Tapi dibaliak sadonyo tu, nan paliang pantiang adolah baa wak manjadi urang nan sukses di rantau. Bisa mambangkik batang tarandam. Bisa wak mancaliak an ka urang gaek juo urang kampuang bahwasanyo awak urang nan bisa sukses sarupo nan urang-urang saisuak. Jikok lah suskes baru wak bangun nagari wak sasuai jo kamampuan jo kasanggupan awak masiang-masiang.
               

                Rawamangun, 5 Desember 2012 (refleksi anak rantau) 
               

Tidak ada komentar:

Posting Komentar